Guraandhala 25, 2015
Caayaan Tokkummaa Baqattoota Oromoo Biyya Masrii (CTBOBM)
eega maqaa kanaan hundeeffamtee eegalee maqaan Oromoo UNHCR fi mootummaa
Masrii biratti akka dhagahamu qooda ol’aanaa taphatte. Himatni
baqattummaa (case )
ilmaan Oromoo biyya Masrii jiraniidhaa hundee dhugaa irratti akka
jajjabaatu gochuu fi gurgurtaa jalaa akka baraaramu taasisuun
danda’ameera. Ammas taanaan Habashoota case Oromoo butachuuf yaalanii fi
warra Oromoo keessaa Habashootatti gurgurachuuf yaalu saaxiluun
jabaatee itti fufee jira.
Kana
malees Oromoo fi Habashoonni impaayera Itoophiyaa keessatti seenaan
keessa dabranii fi har’as haalli keessa jiran walii faallaa waan taheef,
biyya baqaa keessatti Habashaa waliin caayaa hawaasummaa tokko jalatti
hiriiruun akka hin danda’mne ifa galaa dha. Caayaan Tokkummaa Baqattoota
Oromoo Biyya Masrii (CTBOBM)dhugaa tana warra abbaa biyyaa fi UNHCR
hubachiisuudhaan, akka dhimmi Oromoo addatti hubatamuu fi Oromoon ofiin
of ijaaree rakkoo isaa himachuu danda’u dandeessisuu irratti hojii
guddaatu hojjetame. Injifannoon gama kanaan gonfatames salphaa miti.
Oromummaa jabeessuu fi akka oromootti oromoon akka yaadu gochuu irratti
tattaaffii guddootu godhame. Tattaaffiin barbaachisaan kun ammas
jabaatee itti fufee jira.
Qooda
jaaraa Caayaan gumaachite irraa hangana eega dubbannee booda,
yaaddoowwan gurguddoo yeroo ammaa hawaasa baqataa Oromoo Cairo gidduutti
mul’atu irraa dubbannee furmaataas akeekuu barbaanna. Yaaddoon hawaasa
keenya Cairo keessatti mul’achaa jiru gurgurddaan bakka lamatti bahee
hubatamuu danda’a. Kan duraa farra tokkummaa Oromoo kan tahe adeemsa
gandummaa ti. Kan lammaffaa maadhee diinaa hawaasa keenya keessatti
hidda naqachaa jiruu dha.
Dhimma
gandummaa irraa haa kaanu. Sadarkaan sabboonummaa keenyaa hanga
ammaatti jabaatee bakka silaa hawwamu gahuu hanqachuu irraa kan ka’e,
hawaasni baqataan afooshaa kutaa kutaa isaa jaarratee gaafa gaddaa fi
gammachuu wal cinaa dhaabbachuuf tattaafachuun waanuma mul’achaa turee
fi jiru. Haa tahu malee, afooshaaleen kun akka itti socho’an irratti yoo
sirni itti tolfamuu baate, balaa tokkummaa Oromoo akka hamaatti
gaaga’utu dhalata. Afooshaan tamuu gaafa taaziyaa, dhukkubaa, balaa, fi
kkf irratti wal cinaa dhaabbachuu bira dabartee sochii siyaasummaa qabu
keessa seenti taanaan daangaa afooshummaa isiidhaa irra ceetee madda
yaaddoo taati.
Hafooshaan
takka sochii siyaasummaa keessa seenuu jechuun maal jechuu dha? Deebiin
ifaa dha. Maqaa kutaatiin wal jaaranii haala rakkoon hawaasummaa homaa
hin mudatin keessatti dhimma siyaasummaa kutaa sanii irraa hadoodanii
dubbachuu, warra kutaa biraa of irraa fageessanii bobbaa fi gala irratti wal qofa quba qabaachuu, seenaa kutaan sun
qabaachaa turte hamtuus taatu toltuu garmalee halluu dibanii
miidhagsanii himachuu, san birayyuu dabranii nama kutaa san keessatti
dhalatee seenaan isaa beekamu suuraa isaa bifa T-shirtiitiin
maxxanfatanii miseensota kutaa saniif addatti raabsuu, maqaa
afooshaatiin kan jaaraman tahuu hanga of dagatanitti fagaatanii deemanii
Oromoo kutaa biraa irraa seenaa addaa fi of danda’e akka qabanitti
walitti himachuu fi ittiin wal kakaasuu, qalbii miseensota kutaa sanaa
keessatti sanyii naannummaa fi ofittummaa facaasuu faa dha. Kun ammoo
Oromummaa mallattoo jabinaa fi guddina keenyaa saniif dursa kennuu manna
eennyummaa kutaatiif akka bakka guddaa kenninu nu godha. Gabaabaatti nu
diiga. Guddina keenya xiqqeessee daranuu alagaan akka nu qoqqoodee
nuratti roorrisu haala mijjeessa.
Rakkoon
kana fakkaatu kun qabatamaatti Cairo keessatti mul’ateera, mul’aaas
jira. Sochiin balaa qabu akkasii kun dirmannaa ilmaan Oromoo kutaa
hundumaatiin kan hin dhaabsifamne yoo tahe balaa guddaa qabaata.
Afooshaaleen kutaa biros fakkeenya diigaa fi qaanfachiisaa akkasii kana
wallaalaanis tahee xiiqiidhaan hordofanii dorgoommii naannummaa diigaa
keessatti akka hiriiran taasisuu danda’a. Yeroo itti ummanni Oromoo
biyya keessaa fi alatti tokkummaa keenyatu laaffate jedhee walitti
booyaa jiru tana keessatti haalli kun yoo mul’ate kun waan diinni tahe
jedhee duubaan goree nu diiguuf hojjechaa jiru tahuutti nama
shakkisiisa.
Seensa
bara kanaa irratti haalli reefuu dubbatame kun wayta Cairo keessatti
mul’ate, CTBOBM dubbii tanaan rifattee sagalee mormii dhageessiftee
turte. Warri hojii akkasii kana irratti hogganummaadhaan bobba’e CTBOBM
jalatti kan hin argamne waan taheef garuu, Caayaan dubbii tana irratti
gaafatama fudhattee dhaabsisuu hin dandeenye. Sochiin rifaasisaan
akkasii kun kan jalatti geggeeffame qaama hawaasummaa Oromoo biraa
keessatti waan taheef, qaama san irraa tarkaanfiin hatattamaa fudhatamee
tokkummaa Oromoo balaaf saaxilame sirreeffama jennee osoo eegnuu yoona
geenye. Hanga ammaatti garuu gochaa maqaa afooshaa kutaa Oromoo
takkaatiin godhamte san balaaleffachuu fi fakkeenyummaa isiis ittisuu
irratti qaama silaa itti gaafatamu san irraa wanni xiixame hin jiru.
Ibsa kana illee yeroo kanatti baasuu wanni barbaachiseef tokko
yaaddoodhuma tana.
Gandummaan
farra tokkummaa ti. Namni gandummaa baballisu rirma tokkummaa ummata
Oromoo ti. Warra gochaa diigaa akkasii irraa akka deebi’aniif gorfamnaan
fudhachuu didanii daranuu achii as loluu barbaadan duubaan diinni akka
jiraachuu malu shakkuu barbaachisa. Warri dogoggorfamanii sochii
diigmayaa akkasii keessaa qooda fudhatan yeroodhaan yakka kana keessaa
akka of baasan dhaamnaaf. Kanneen didanii gochaa fokkataa kana akka
hojii eebbifamaatti itti jiran ammoo kaayyoo diinummaa akka qabanii
hoj-manee diinni kenneef kan hojjechaa jiran tahuu hubannee of irraa
ittisuu fi saaxiluun fardii taha. Dinni qaawwa warri akkanaa nutti banaa
jirutti dhimma baatee tokkummaa Oromummaa diigdee bara baraan qabeenyaa
Oromoo saamaa jiraachuu hin eehamnuuf. Kanaafuu ilman Oromoo Cairo
keessaas tahee biyyoota adda addaa jiran gochaa farra tokkummaa maqaa
afooshaatiinis tahee bifa biroon raaw’atamu jabinaan akka dura
dhaabbatan yaadachiifna. Jaarmaya waloo jabeeffatanii afooshaa kutaa
waan jedhamu yoo dandayame jigsuu, dadhabamu ammoo daangaa murtaawe itti
tolchanii toyachuu irratti akka waloon hojjennu waamicha dabarsina.
Yaaddoon
Cairo keessatti harkaa nu qabdu tan biraa waa’ee qunnamtii diinaa ti.
Hawaasa Oromoo Cairo jiraatu keessatti, warra akka qunnamtii embaasii
Wayyaanee qabu ragaadhaan irra gahametu jira. Jarri kun harka tokkoon
akka sabboonaa Oromoo sirnichaan doorsifamee biyyaa baheetitti case
tolfatanii UNHCRitti galmaawanii osoo jiranii, gama kaaniin ammoo
embaasii diinaa waliin hariiroo tolfatanii baqattoota Oromoo dhugaa
doorsisu. Jaarmayni hawaasummaa Oromoo kan warri diina waliin hariiroo
qabu akkasii kun keessatti buulessa tahee mul’atu waan kana irratti
maaliif akka hin yaaddofne nu ajaa’iba. Dhugumatti sirna Wayyaanee kan
baqannee biyyaa bane yoo taate, nu keessaa warra embaasii Wayyaanee
waliin qunnamtii tolfatee hojjetu callisnee laaluu bira dabarree akka
manguddoo keenyaatitti kan laallu yoo taheef nama sodaachisa. Namoota
akka wakiilummaa diinaatitti hojjechaa jiran of keessaa saaxilanii
qulqullummaadhaan dhaabbachuu wanni nama dhorku maal akka tahe ifaa
miti. Jaarmaya waan kanaan qeeqamu keessatti galmaawanii kan argaman
ilmaan Oromoo 95% ol tahan qulqulluu fi daba kana kan quba hin qabne
tahuun ammo ifatti beekamuu qaba.
Qaamni
jaarmayaa qeeqni kun itti xiyyeeffatu waan lama keessaa tokko gochuuf
mirga qaba ture. Tokko, namoota jarmayaa san keessa jiran kan maqaan
isaanii embaasii Wayyaanetiin wal qabatee yeroo baay’ee ka’u kana of
keessaa basanii saaxiluu. Yoo kana didanii qulqullummaa namoota
saniitiif kan falman taate ammoo, qulqullummaa namoota sanii ragaadhaan
deeggaranii agarsiisuudhaan shakkii irraa of walaboomsuu danda’uu dha.
Kana lamaanuu keessaa tokkoyyuu raaw’achuu hin dandeenye, yookiis hin
barbaanne.
Haala
balaafamaa akkasii of duratti argaa Caaayaan calliftee laaluu hin
dandeessu. Qaamonni diina waliin hidhata qaban kun ABOdhaan
‘goolessituu’ jedhanii waamuu isaaniif ragaa qabatamaa harkaa qabna. ABO
jechuun dhaaba nuti baqattoonni Oromoo marti deeggartummaa yokiin
miseensummaa isaatiif itti shakkamnee himata keenya UNHCR naqannee
jirruu dha. ABOn mootummaa Itoophiyaatiin akka malee yakkamuu fi ilmaan
Oromoo kumoonni kudhanoonnis maqaa deeggartummaa dhaaba kanaatiin
yakkamanii ajjeefamaa, hidhamaa doorsifamaa, saamamaa fi biyya irraa
godaansifamaa jiraachuu addunyaatu raga bahaa jira. Amnesty
International, HRW, fi jaarmayaaleen mirga namoomaa idil addunyaa kan
biro hedduun kanaaf raga dha.
Dhaaba
kanaan kan ‘goolessituu’ jedhee afaan guuttatee dubbate mootummaa
Wayyaanee qofa. Kana irraa kan hafe addunyaan ABOdhaan ‘goolessituu’
jettee yeroo itti waamte hin qabdu. Kanaafuu, qaama balaa sirna
Wayyaanee jalaahin baqadhee dhufe ofiin jechaa, deebisee ammoo jecha
Wayyaaneen qofti dhaaba ABO ittiin waamtutti dhimma bahee ‘goolessituu’
jedhu akkasii kanaan maal jedhama? Nuti gama keenyaan kan arraba
Wayyanee irraa fudhee dhaaba Oromoo tokko maqaa balleessu ergamaa
Wayyaanee waan taheef ni sodaanna. Jaarmaya qaamota arraba diinaa
tahanii dubbatan akkasii of keessatti hammate waliinis akka baqataa
Oromootti waliin teenyee rakkoo keenya dubbachuu hin dandeenyu.
Warri
akka baqataa Oromootti miilla tokkoon nu waliin UNHCR dhaabbachaa,
miilla kaaniin ammoo embaasii Wayyaanee dhaabbatu of irraa eeguu fi
qaama dhimmi laaluttis himachuuf mirga ni qabna. Warra arraba tokkoon
case baqattummaa tolfatee himachaa arraba biraatiin ammoo arraata
Wayyaanee tahee dhaaba Oromoon kumaatamni itti yakkamee mana hidhaa
ciisuun ‘geelessituu’ jedhu akka qoosaatti hin laallu. Diinni case
Oromoo balleessuuf jecha jara kana nurratti bobbaase jennee shakkina.
Duula bara meeqa guutuu nu gaafate kan case Oromoo case Habashootaa
irraa adda baafnee addunyaatti beeksisuutti milkoofne deebisanii nurkaa
daaraa gochuuf jecha warra diina waliin dhaabbatee arraba diinaatiin
dubbatu jabeessinee balaaleffanna. Ilmaan Oromoo Cairo keessaas tahee
addunyaa mara irra jiran illee yaaddoo keenya kana nuu hubachuudhaan
akka nu cinaa dhaabbatan waamicha dabarsina. Baqattoonni Oromoo jaarmaya
gochaa hidhata diinummaatiin yakkamu kana keessatti fayyaalummaadhaan
hiriiranii jiranis shira namoota hagoo (muraasaan) isaan irratti xaxamee
case isaanii busheessuuf hojjetamaa jiru kana irratti dammaqanii akka
of irraa dhaabsisan waamicha dabarsinaaf.
Mootummaan
Wayyaanee nu warra cunqursaa sirnichaa baqannee biyyaa bane bakka
jirrutti hordofee miidhaa guddaa nurraan gahuu danda’a. Wayyaaneen nu
adamsitee rukutuu birayyuu dabartee warruma maqaa OPDOtiin isii faana
dhama’uyyuu ‘likkiitti si galchina’ jettee kan dhaadataa jirtu tahuun
ifaa dha. Diinni tuffii Oromootiin guutamee akkasitti nu salphisuu fi
lafa irraa nu balleessuuf hojjechaa jiru kun, baqataa Oromoo keessattis
maadhee tolfatee bifa kanaan nu haleelaa jira jennee amanna. Kanaafuu,
baqataan Oromoo Cairo keessa jirus tahee kan addunyaa irraa martuu,
harka tokko taanee haleellaa diinni karaa adda adaatiin nurratti
aggaammataa jiru akka waloon fashalsinu waamicha Oromummaa dabarsina.
Injifannoo Ummata Oromoof !
KOREE Caayaa Tokkummaa Baqattoota Oromoo Biyya Masrii
Kaayroo Masrii
CHAIRMAN
ABDALLA JAMAAL MUME
UORA – EGYPT
United Oromo Refugees Association in Egypt
https://www.amnesty.org/en/library/asset/AFR25/006/2014/en/539616af-0dc6-43dd-8a4f-34e77ffb461c/afr250062014en.pdf
HOA News Tags:
Posted by admin - 25/02/2015 at 4:15 pm